Nord Kivu: FDLR yagabweho igitero hicwa indwanyi 5 zayo

Mu mirwano yabaye ku wa gatandatu tariki ya 14 Ugushyingo 2015, i Rubero muri Nord Kivu abarwanyi 5 ba FDLR barishwe mu rugamba rwabahuzaga n’izindi nyeshyamba za UPDI (Mayi Mayi de l’Union des Patriotes pour la Défense des Innocents.

Nk’uko byatangajwe n’imiryango iharanira uburenganzira bw’ikirembwa muntu muri Nord Kivu, ngo inyeshyamba UPDI nizo zagabye igitero gitunguranye kuri FDLR mu gace ka Kimaka (Lubero).

Bitangazwa kandi ko imirwano yamaze amasaha abiri, inyeshyamba za UPDI zikaba zaramenesheje FDLR zisigara zigaruriye aka gace ka Kimaka FDLR yari isanzwe ifitemo ibirindiro.

Amakuru atangazwa n’ikigo CEPADHO (Centre d’étude pour la promotion de la paix, la démocratie et les droits de l’homme ) ni uko abarwanyi 5 ba FDLR bahasize ubuzima abandi benshi barakomereka mu gihe ku ruhande rwa UPDI abazwi bishwe ari 2.

Nyuma y’iyo mirwano ngo inyeshyamba za UPDI nizo ubu zigaruriye igice kinini cyo muri ako gace,  ubu  ngo zikaba zirebana ay’ingwe na FDLR dore ko iyo mitwe uko ari ibiri ariyo yigaruriye teritwari ya Lubero.

Abaturage bo muri Kimaka no mu tundi duce 3 bituranye, ubu ngo bavuye mu byabo barahunga, kugeza magingo aya ingabo za Leta (FARDC) zikaba zitarakandagiza ikirenge muri ako gace.