Stella Nyanzi alemesezza abajulizi ba Gav't okumuwaako obujulizi

DR. Stella Nyanzi ateze gavumenti akatego mu kkooti n'alemesa abajulizi baayo bana abaabadde baleeteddwa okumulumiriza bwe yakubye ebituli mu misango egyamuggulwako n'asaba omulamuzi gigobwe ate naye amute.

Dr. Stella Nyanzi

Bya ALICE NAMUTEBI

DR. Stella Nyanzi  ateze gavumenti akatego mu kkooti n'alemesa abajulizi baayo bana abaabadde baleeteddwa okumulumiriza  bwe yakubye ebituli mu misango egyamuggulwako n'asaba omulamuzi gigobwe ate naye amute.

Oludda oluwaabi lwabadde lwetegefu okutandiika okulumiriza Nyanzi era lwazze n’abajulizi bana  okwabadde abapoliisi ne looya Dalton Opwonya, atuula ku kakiiko akalwanyisa obuseegu aka 'pornographic committee'.

Opwonya yabadde asitusse atandiike okulumiriza Nyanzi looya we, Isaac Ssemakadde kwe kutegeeza omulamuzi Gladys Kamasanyu owa kkooti ya Buganda Road nti balina ensonga ez’amaanyi nga we banaamalira okuzimunnyonnyola, obujulizi bw’oludda oluwaabi ajja kuba takyetaaga kubuwulira kubanga ajja kufundikira emisango egyaggulwa ku Nyanzi agigobye.

Ssemakadde yategeezezza kkooti nti abaggula ku Nyanzi emisango baakola ensobi mpitirivu ezitakkirizibwa mu mateeka kubanga tosobola kuddira musango gumu ate n’ogugattamu emisango emirala nga etaano!.

Yawadde eky’okulabirako nti mu musango ogusooka ogw’okukozesa obubi yintanenti naddala omukutu gwa Facebook, oludda oluwaabi lwagamba nti Nyanzi  yateekako ebigambo eby’obuseegu, eby’obukaba ate nga biwemula.

Yagambye nti okusinziira ku tteeka lya MCA lye bakozesa okuvunaana Nyanzi, bw’ogamba nti ebigambo byali bya buseegu, bya bukaba era biwemula giba emisango esatu gy’oteekeddwa  okwawula kyokka  gino gyonna bagiteeka mu musango gumu ogw’okukozesa obubi yintanenti nga kati ye nga looya we afuna obuzibu okumuwolereza kubanga tamanyi musango ki mutuufu gw'alina kuwoza.

Yagasseeko nti mu musango gw’okubiri kigambibwa nti Nyanzi yataataaganya eddembe lya Pulezidenti Museveni ng'ayita mu bye yawandiika ku Facebook kyokka ne bagattako nti Nyanzi  yayingirira Museveni mu biseera bye by'abeera nga ebyeddembe n’okutaataaganya obulamu bwe obw'ekyama.

Wano era yannyonnyodde nti omusango guno gwagattibwamu emisango emirala nga 7 ekimenya amateeka ate nga n’ebigambo Nyanzi bye yateeka ku Facebook oludda oluwaabi terunnyonnyola oba nga ddala yabiyisa mu luyimba, mu katambi k’ebifaananyi, mu maloboozi obanga byali mu lugero.

Ssemakadde yawadde omulamuzi Kamasanyu ensala z’abalamuzi ba kkooti Enkulu eziwerako abalagibwa ensobi ezaakolebwa mu misango poliisi gye yaggula ku bantu nga bonna bakomekkereza emisango bagigobye ne bata abaali bavunaanibwa, bw'atyo n'amusaba naye akole nga balamuzi banne.

Omulamuzi Kamasanyu yagambye nti agenda kwetegereza ensonga ezimutegeezeddwa era awe ensala ye oba nga kisaanidde okugoba omusango n'okuyimbula Nyanzi oba okulagira oludda oluwaabi okugenda mu maaso n’okuleeta abajulizi.

Nyanzi amaze emyezi ebiri mu kkomera e Luzira ku misango gy’okozesa obubi emikutu gya yintanenti nga mu bigambo bye yawandiika teyakoma ku kulumba Museveni wabula yagattako ne nnyina.

Nyanzi yagaana eby’okumweyimirira n'ategeeza omulamuzi nti kaasigale e Luzira asobole okuyigiriza basibe banne  abakyala engeri gye bakozesaamu Facebook.