Oda Paccy mu myiteguro yo kumurika Album ye ya Gatatu

Umuhanzikazi Oda Paccy kuri iki cyumweru taliki 24 Mutarama agiye gutaramira abakunzi be muri H ZONE akabari gaherereye kwa Mironko i Gikondo abaririmbira indirimbo ye nshya yise ‘Niba Ari Wowe’ ku nshuro ya mbere kuva yasohoka.

Uyu muhanzi yamaze no kunoza umugambi w’ibitaramo bizamufasha kwegera abafana birushijeho mu rwego rwo gutegura igitaramo cyo kumurika Alubumu ye ya gatatu ateganya gukora muri uyu mwaka.

Oda Paccy mu minsi ishize nibwo yamuritse amashusho y’indirimbo ye nshya yise ‘Niba Ari Wowe’ yakorewe i Dubai, anahishurira rubanda ko icyamujyanye muri uyu mujyi ukomeye ku isi ari ugutunganya amashusho y’indirimbo ye nshya yise ‘Niba Ari Wowe’.

Mu mpera z’iki cyumweru nibwo hateganyijwe igitaramo cya mbere uyu muhanzikazi azaririmbiramo iyi ndirimbo nshya ikunzwe muri iyi minsi.

Oda Paccy yatangarije Imirasire.com impamvu y’iki gitaramo ndetse anahishura ko yamaze kunoza umugambi w’ibitaramo agomba gukorera hirya no hino mu gihugu mu rwego rwo kwegera abafana birushijeho no kumenyekanisha igikorwa cyo kumurika Alubumu ateganya muri uyu mwaka.

Mu magambo ye, uyu muhanzikazi yagize ati;Nyuma yo gusohora iriya ndirimbo nagiye mbona abantu benshi batandukanye banyeretse ko turi kumwe banshyigikiye byaranshimishije, bimpa imbaraga zo gukomeza kuyisangiza abantu bose badahwema kumba hafi ndetse n’abakunzi b’umuziki nyarwanda. Ni muri urwo rwego ngiye gutangira ibitaramo ahantu hatandukanye byitiriwe iyi ndirimbo mu rwego rwo kurushaho kuyamamaza ndetse no gutangira kwamamaza alubumu yanjye ya 3.”

Ku ikubitiro, Oda Paccy ku Cyumweru tariki 24 Mutarama 2016, azaririmbira i Gikondo ahazwi nka H-ZONE kuri ‘Dodani’ zo kwa Mironko. 
Indirimbo ye ‘Niba Ari Wowe’ azayiririmbira abazitabira ku nshuro ya mbere. Kwinjira muri iki gitaramo akaba ari amafaranga 1000 y’u Rwanda, biteganyijwe ko kizatangira ku isaha ya Saa mbiri z’umugoroba.

Nyuma y’iki gitaramo Oda Paccy yadutangarije ko afite gahunda ndende y’ibindi bitaramo ateganya gukora bizabanziriza imurikwa rya Alubumu ye ya 3, izaba inariho iyi ndirimbo yitiriye ibi bitaramo byose agiye gukora.