Ibyamamare mu Rwanda byitabiriye itora rya Referendumu

Ibyamamare byo mu Rwanda biri mu barenga miliyoni esheshatu bitabiriye itora rya Referendumu kuri uyu wa Gatanu tariki ya 18 Ukuboza 2015.

Abanyarwanda bujuje ibyangombwa bagera kuri miliyoni esheshatu n’ibihumbi 400 nibo biteganyijwe ko bitabira amatora ya referendumu. Abatuye muri Diaspora batoye kuwa Kane tariki ya 17 Ukuboza 2015.
Senderi Hit, Masamba Intore, Platini na Oda Paccy, bari mu byamamare byatoye mu masaha ya kare.
Mu museso Senderi yaganiriye na IGIHE yerekeze i Gikondo aho yatoreye ndetse yashimangiye ko Umunyarwanda wese watoye akwiye kubyishimira kuko yatanze umusanzu ukomeye ku gihugu.
Abahanzi bo muri Kina Music, Dream Boyz , Christopher n’umuyobozi wabo Producer Clement na bo batoye mu ba mbere. Christopher yatoreye mu Murenge wa Nyakabanda mu Kagari ka Munanira ya 2 mu gihe abagize Dream Boyz batoreye aho batuye ku Kicukiro.
Masamba Intore na we watoye mu bambere ku Kacyiru, yavuze ko aho yanyuze no mu gace atuyemo yanyuzwe n’uburyo abaturage bitabiriye iri tora ari benshi ndetse bose umubare munini wumva baririmba ko bagomba gutora ‘Yego’.
Referendumu iheruka kuba mu Rwanda ni iyabaye tariki ya 26 Gisurasi 2003 ubwo hatorwaga Itegeko Nshinga u Rwanda rugenderaho kugeza ubu.
Icyo gihe mu baturage bari bafite uburenganzira bwo gutora, 93,4% batoye YEGO, naho 6,5% batora OYA.
Izindi Referendumu zabaye mu Rwanda twavugamo nk’iyo ku itariki ya 17 Ukuboza 1978 ikaba yaraje ikurikira « Coup d’Etat » yakozwe n’uwahoze ari Perezida w’u Rwanda Juvenal Habyarimana muri 1973. Icyo gihe na bwo Referendumu yari igamije kwemeza Itegeko Nshinga rishya.
Indi Referendum yabaye ari nayo ya mbere mu mateka y’u Rwanda ni iyo ku itariki ya 25 Nzeli 1961 yari igamije kubaza Abanyarwanda niba bashaka kuva mu butegetsi bwa cyami bakajya mu butegetsi bwa Repubulika.