Mu gihe umutekano w’u Burundi uhagaze nabi amahanga n’imiryango mpuzamahanga bakaba bakiwigaho nta gisubiza kihuta gitangwa, ubwicanyi burakomeje; kuri uyu wa gatatu mu gace ka Cibitoke hatahuwe imirambo y’abantu 4 abandi 3 ku Mutakura.
Ku muhanda wa cumi na gatatu muri Mutakura, muri zone Cibitoke hatahuwe imirambo 3 undi umwe atahurwa mu Cibitoke ku muhanda wa 10.
Polisi hamwe n’abaturage batoraguye iyo mirambo bemeza ko batazi imyirondoro yabo, gusa ku rundi ruhande hari abahamya ko abo bantu baba bariciwe ahandi bakaza kujugunywa aho ngaho.
Umurambo watowe ku muhanda wa cumi muri zone ya Cibitoke, akaba ari uw’umugande uzwi ku izina rya Freddy Nkurunziza wakoraga kuri ETS (Ecole Technique Secondaire), abamwishe ngo bakaba bamunigishije umugozi.
Mu gihe hari abicwa mu ibanga, n’amasasu menshi aba yumvikana hirya no hino mu duce tugize umujyi wa Bujumbura.
Amasasu yumvikanye muri Nyakabiga ya kabiri, ku muhanda wa cumi ubwo abapolisi bagwaga mu gateko k’abantu bitwaje intwaro. Muri iyo mirwano umupolisi umwe ngo yahasize ubuzima abandi 3 barakomereka.
Mu Gatumba naho mu ijoro ryo ku wa kabiri, hatewe gerenade mu kabari ihitana abantu 2 abandi 3 barakomereka, iyo gerenade ikaba yaratewe aho mu Gatumba, komine Mutimbuzi, hafi y’urugabano ry’u Burundi na RDC.
Mu gihe bigaragara ko ubwicanyi bugikomeje mu Burundi, Ban Ki Moon umunyamabanga mukuru w’umuryango w’abibumbye yagaragaje ko u Burundi burimo kugana ahabi ndetse anatangaza ko hakigwa uburyo hakoherezwa ingabo zo kujya kugarura amahoro.