Perezida Kagame yatunze urutoki ubutegetsi bwa Nkurunziza avuga ko ari bwo buri inyuma y’ubwicanyi buri mu Burundi

Perezida w’u Rwanda, Paul Kagame yatunze urutoki ubutegetsi bwa perezida w’u Burundi, Pierre Nkurunziza avuga ko ari bwo buri inyuma y’ubwicanyi bwa hato na hato bumaze iminsi mu Burundi.

Ibi perezida Kagame yabivugiye kuri uyu wa 06 Ugushyingo mu muhango wo gushimira abantu bagize uruhare mu kurokora Abatutsi bicwaga mu gihe cya Jenoside ndetse n’abagize uruhare mu bumwe n’ubwiyunge bw’Abanyarwanda .
Perezida Kagame mu ijambo yavuze yagarutse ku bibera mu gihugu cy’u Burundi, arerura avuga ko ubutegetsi bw’u Burundi buri inyuma y’ubwicanyi bukomeje kwibasira abaturage, ndetse anongeraho ko aticuza kuba abivugiye ku mugaragaro.
Perezida Kagame yagarutse ku ihagarikwa ry’imfashanyo amahanga yateraga u Burundi, avuga ko byose biri guterwa n’amateka ajya gusa nk’ayo mu Rwanda, aho yibajije niba ubuyobozi buberaho kwica abantu kuva mu gitondo kugeza nimugoroba.
Perezida Kagame kandi yibajije ukuntu perezida Nkurunziza ayobora abaturage be nta muntu uzi aho aba ahora yifungiranye ahubwo ugasanga abantu bapfa buri munsi abandi birirwa bakurura imirambo.
Perezida Kagame kandi yavuze ko ubu abantu bari bwumve yakoze ishyano kubera ko yavuze ikindi gihugu ngo kubera dipolomasi cyangwa politiki ariko ngo niko bimeze kandi bifite n’ingaruka ku Banyarwanda.

Aha yaboneyeho kwibaza aho uwateye u Burundi ibibazo nk’ibyo yaturutse, avuga ko nta wundi muntu wagiye kubatera ibyo bibazo, ko n’uwaba akwifuriza inabi yahera ku mafuti yawe.
Yakomeje avuga ko n’uwavuga ngo n’u Rwanda rubitera, umuntu w’umugome mu Rwanda waba wifuriza inabi Abarundi yaba yarahereye ku bubi bw’Abarundi, yahereye ku bayobozi babi b’u Burundi bakorera inabi abantu babo wenda nawe akabijyamo. Ariko ikibazo ngo n’icy’abantu ubwabo.
Perezida Kagame yavuze ko Abarundi bari bakwiye kuba barize isomo ku byabaye mu Rwanda bamwe banagizemo uruhare, aho yavuze ko bamwe mu batemye abantu harimo bamwe bavuye hakurya y’umupaka.
Perezida w’u Rwanda yakomeje yibaza uburwayi Abanyafurika turwaye, yibutsa Abanyarwanda ko bakwiye kubanza kurwana ku nyungu zabo, bakarwanya ikibi ngo kitazabasubiramo kuko ishyano ryakozwe rihagije kubw’ibyo bakaba batakwemera ko risubira.
Perezida Kagame yanibajije Imana abayobozi b’u Burundi bavuga ko bemera dore ko ngo bamwe ari n’abapasitoro bagendana Bibiliya. Yavuze ko bakora ibyo baniyita ko bemera Imana ari abantu b’Imana, ariko yibaza aho Bibiliya ibwira abayobozi kwica abantu babo.